Av og til ser Joseph Vaughan kvite fjør. Fyrste gong da far hans døyr, og seinare når noko uhyggjeleg er i ferd med å skje. Vi møter Joseph som 12-åring i ein småby i sørstatane i USA. Ei 11 år gammal jente blir funnen valdteken og myrda, det fyrste i ein serie med groteske drap. Lesaren fylgjer så jakta på ein slu mordar i ein intens og spennande thriller. Samstundes får vi livshistoria til Joseph, som er skildra på usedvanleg truverdig vis. Eg innrømmer at eg har sjekka både det eine og det andre for å finne ut om dette er «bygd på ei sann historie»…
Mordaren slepp stadig unna, og Joseph lev i frykt heilt til han etter femti år blir konfrontert med gjerningsmannen. Joseph skriv heile livet, og blir ein stor forfattar etter at ein kamerat greier å overtale han til å skrive si historie. Det er ei historie om kvardagsliv i ein amerikansk småby, oppvekst og familieliv, den store krigen i Europa, rettsvesen og politikk, hemnlyst og framandfrykt. Så er det eit skjebnedrama om stor kjærleik og umenneskelege tap, solfylt lykke og hjerteskjærande urett, og om brennande lidenskap og utmattande håpløyse.
Boka kom på norsk i 2008. Forfattaren var tidlegare refusert 22 gonger, men ga seg ikkje, og «Engler over Georgia» vart hans store internasjonale gjennombrot. Oversetjaren Agnete Øye har teke vare på eit svært rikt og fint språk.
Dette er verkeleg litt av ei bok!
Anbefalt av Anne Kristin Rødal, Os bibliotek Bjørnsons minde